Faoi láthair, is iad na comhairlí áitiúla a cheapann rialacha na comharthaíochta dátheangaí sa tuaisceart. Ba cheart go nglacann comhairlí bearta réamhghníomhacha chun an Ghaeilge a chuimsiú ar chomharthaíocht sráide nuair a bhíonn éileamh soiléir, daonlathach ann sa tsráid sin.

Gealann an Dream Dearg go dtroidfidh muid le go gcuirfidh an Feidhmeannas anseo reachtaíocht teanga i bhfeidhm, agus sa chás nach dtarlóidh sin, go gcomhlíonfaidh Rialtas na Breataine an choimitmint phoiblí is déanaí dá gcuid. Leanfaidh muid orainn ag seasamh an fhóid ar son Achta.

Níl rannpháirtíocht dhaoine óga inár bhfeachtas ina ábhar iontais dúinn. Tá bunús a saolta caite acu ag troid ar son áiseanna agus cearta bunúsacha a sholathraítear dá gcomhpháirtithe Béarla, go háirithe in san earnáil óige Gaeilge.

Is cúis mhór bhróid dúinn é fás leanúnach an Ghaeloideachais sa tuaisceart. Is iomaí uair a sheas muid le Gaelscoileanna, agus iad ag tabhairt dúshláin do theip na Roinne Oideachais i leith a ndualgas reachtúil an Gaeloideachas a ‘ghríosú agus a éascú’, dualgas a cuireadh orthu faoi Chomhaontú Aoine an Chéasta.

Is gné tábhachtach í an Ghaeilge d’ár n-oidhreacht anseo, agus ba cheart, mar sin, go mbeadh an Ghaeilge le feiceáil ar chomharthaíocht, go háirithe i spásanna roinnte. Tugann sé deis do dhaoine dul i dtaithí ar an teanga i dtimpeallacht neodrach.

Tá feachtas an Dream Dearg ar son #AchtAnois fréamhaithe sna hidéalacha gurb ionann cearta teanga agus cearta daonna; éilímid Acht Gaeilge cuimsitheach, neamhspleách, ceart-bhunaithe, rud a gealladh dúinn i gComhaontú Chill Rímhinn 2006.