Dara léamh ar bhille Gaeilge rite le móramh ollmhór i Westminster

I bparlaimint Westminster tráthnóna, ritheadh an dara léamh ar an mbille maidir leis an nGaeilge sa Tuaisceart.

Thacaigh na páirtithe polaitíochta ar fad leis an mbille, ach amháin an DUP a dúirt nach é a socraíodh sa Chomhaontú Ré Nua-Cur Chuige Nua in 2020.

Ghearáin an DUP chomh maith nach mbeadh an chumhacht chéanna ag an gCoimisinéir Ultaise agus a bheadh ag an gCoimisinéir Gaeilge de réir na reachtaíochta nua.

Ina ainneoin sin, vótáil 380 feisirie i bhfabhar an bhille agus ceathrar ina aghaidh.

Mhaígh feisirie an DUP Carla Lockhart gur bua a bhí ann don dream a bhfuil arm déanta acu den Ghaeilge.

Mhol Stephen Farry ó Pháirtí na Comhghuaillíochta di, áfach, neamhshuim a dhéanamh den fhíorbheagán daoine a bhfuil fonn orthu an Ghaeilge a úsáid mar arm.

Dúirt Claire Hanna ón SDLP gur mór an trua go gcreideann daoine gurb ionann sochar do dhream amháin agus dochar don dream eile.

Mhaígh Stát-Rúnaí an Tuaiscirt Chris Heaton-Harris gurb é an cóimheas ar fhéiniúlachtaí cultúrtha a chéile bunchloch na reachtaíochta agus dar leis go mbeidh áit an Tuaiscirt sa Ríocht Aontaithe níos seasmhaí dá bharr sin.